2005 жылғы 26 қазанда ШЫҰ-ға мүше мемлекеттердің Үкімет басшыларының кеңесі (премьер-министрлерінің)  ШЫҰ Банкаралық бірлестігін құру туралы шешім қабылдады және Шанхай Ынтымақтастық Ұйымы шеңберіндегі Банкаралық ынтымақтастық (бірлестік) туралы келісімге қол қойылды.
ШЫҰ БАБ мүшелерінің құрамына: Қазақстан Даму Банкі, Қытай Мемлекеттік даму банкі, Қырғыз Республикасының «РСК Банк» ААҚ Есеп айырысу-жинақ компаниясы, Ресей Федерациясының Сыртқыэкономбанкі, Тәжікстан Республикасының «Амонатбонк» мемлекеттік жинақ банкі, Өзбекстан Республикасының Сыртқы экономикалық қызметінің Ұлттық Банкі, 2018-2019 жылдардағы маусымда Үнді инфрақұрылымдық қаржы компаниясы мен Пәкістан Республикасының Хабиб Банк Лимитед кіреді және оларға ШЫҰ БАБ-қа мүше банктер мәртебесі берілді.

Шанхай Ынтымақтастық Ұйымы (ШЫҰ БАБ) шеңберінде Банкаралық бірлестік құрудың негізгі мақсаты ШЫҰ-ға мүше мемлекеттердің үкіметтері қолдайтын инвестициялық жобаларды қаржыландыру және оларға банктік қызмет көрсету тетігін ұйымдастыру болып табылады.
ШЫҰ БАБ шеңберіндегі ынтымақтастықтың басым бағыттары мыналар болып табылады:
- инфрақұрылымдық құрылысқа, базалық салаларға, жоғары технологиялар салаларына, экономиканың экспортқа бағдарланған секторларына, әлеуметтік маңызы бар жобаларға баса назар аудара отырып, жобаларды іске асыру үшін қаржыландыруды ұсыну;
- жалпы қабылданған халықаралық банк тәжірибесін ескере отырып, кредиттер беру және тарту;
- ШЫҰ-ға мүше мемлекеттер арасындағы сауда-экономикалық байланыстарды ынталандыру мақсатында экспорт алдындағы қаржыландыруды ұйымдастыру;
- қажетті құпиялылықты сақтай отырып, Келісім шеңберіндегі әлеуетті клиенттер мен ынтымақтастық жобалар туралы ақпарат алмасу;
- кадрларды дайындау, делегациялармен алмасуды және тағылымдамаларды ұйымдастыру, іскерлік симпозиумдар өткізу;
- жалпы қызығушылық тудыратын басқа бағыттар.

ШЫҰ БАБ-қа мүше банктер құрамына әр Тараптан бір өкіл кіретін Кеңес құрады (әдетте, тараптың жоғары лауазымды тұлғасы).
Кеңес отырысы қажеттілігіне қарай Тараптардың жалпы келісімімен, бірақ жылына кемінде бір рет өткізіледі.
ШЫҰ БАБ Кеңесінің құзыретіне мыналар кіреді:
- Келісім шеңберінде Тараптардың ағымдағы қызметін үйлестіру;
- жаңа әлеуетті жобаларды анықтау;
- жобаларды іске асыру барысын қарастыру;
- ШЫҰ-ның Бас хатшысына кейіннен ШЫҰ-ның басқарушы органдарына ұсыну үшін жіберілетін банкаралық бірлестіктің қызметі туралы жыл сайынғы есепті бекіту;
- басқа қаржы және банк институттарымен өзара әрекеттесу.
Кеңесте төрағалық ету ротация қағидаты бойынша жүзеге асырылады.